Mapa de Santa Comba
Iglesia parroquial de San Andrés de A pereira
Con forma de cruz grega, esta igrexa presenta unha planta que parece ter os brazos de iguais dimensións, aínda que un pouco desvirtuados polos volumes anexos ao muro norte (sancristía e pequeno oratorio). No interior, a capela maior e a nave cóbrense con bóveda de canón, que descarga directamente nos muros de carga de cachotería.
A cuberta é a tres augas na nave e a unha nos anexos. A fachada, pola contra, é de cantería. Esta última posúe unha disposición xa coñecida pero de gran orixinalidade na ornamentación, xa que a fornela que alberga a imaxe do santo titular está gardada por un frontón partido na súa parte inferior, e un frontón curvo na parte superior. Ademais, unha parte dela é translúcida, a modo de transparente, recurso moi utilizado na arquitectura barroca. Esta ornamentación complétase cunha cornixa rematada en volutas e pináculos piramidais.
O campanario, sobre unha base en forma de prisma, ofrece dous corpos: o primeiro con arcos de medio punto sobre machóns e un segundo cupuliforme.
